Psa 27 | YON | STEP | Dewid ye yook. Yariman kuu ne kiwaan ari weniin yaa nambirimaan ye karub, kwane ye kuu ne nen bobni yaa burudande nendi ye karub, kowe kane yaambed ne kuu unaniin? Dowan! Yariman kuu ne wadkeri ye aromne angkumonimbon, kowe kane yaambed ne kuu unaniin? Dowan!

Psalms 27

Yook 27

Dewid ye yook.

1 Yariman kuu ne kiwaan ari weniin yaa nambirimaan ye karub,
kwane ye kuu ne nen bobni yaa burudande nendi ye karub,
kowe kane yaambed ne kuu unaniin? Dowan!
Yariman kuu ne wadkeri ye aromne angkumonimbon,
kowe kane yaambed ne kuu unaniin? Dowan!
2 Arewa kamidanbed ne damburune monmari dowad ne nande kamaniib kuu
yimbedmo boknandenib kirobaniib,
ne bondaniib ne yaa manmo keriwendaniib kukui.
3 Ana nangmidanbed ne kuu kanawanewande kebenaniib kuu
ne niindem aom kuu unainban.
Kwane, ne yaa ana wandaniib kuned
ne kangkon kangdommo dobaraniin.
4 Yariman yaa barang mimo kaamonimain,
nembed kereknain kuu kei,
Yariman yambiwoom kumaombed dibara,
ne wad dobaraniin ye aron korem,
kwane ne dowaken kuuYariman ye manimani amun kai yaa wedma,
kwane ne dowaken kuu ye kurikuri ambiwoombed ye kiwaan onma.
5 Amborom kuu dabab kandi yaron kuu
yembed ne nen yambiwoombed dorondandaneen,
kwane yembed ye kurikuri ambiwoombed ne nen biknaneen,
kwane yembed ne nen aromkonombon ari kowaneen.
6 Kwananeen kuu ne korok kuu Godbed nenkoonene
bondan kanawanewandiwen yaa kuu ne nen burudande ari kowaneen.
Ye kurikuri ambib yaa kuu nembed kube baandeni dingkan aye nengke baeb konaniin,
kwaneYariman yaa yook wingkeni yaningko kankoonaniin.
7 OYariman, baandako wengambere.
Ne yaa mimyob keewe kakman are nonondandeneb inanduwe.
8 Ne niindem aom kuu eb dowad yedmoon, “Ye murubia ari dobiri kiwaan onme.” andoon,
kowe, oYariman, eb murubia ari dobiri kiwaan onmiin.
9 Eb murubia kuu ne yaa biknewaab.
Kwane, eb deme karub ne yaa arud wande korondaab.
O God, ne nen bobni yaa burudande bindi ye karub,
eb kuu ne awawi ye karub kowe,
wunekaruwaab, ne yaa domowe wanaab.
10 Nambe ena domowe wananiib kuu
Yarimanbed angkodmewaneen.
11 OYariman, eb kiwaan kedmengkawe.
Ne kuu ne nen yiri kubunandamiibdaniib kowe,
kiwaan yorokmo arimbed ne nen kinban wene.
12 Korondaawa ne bondan yi dingki ari kombarain.
Amborom kuu kwane wedmaan kii ande dudi weng dakmidan kuu ne yaa manmo kerenib,
ne dowad naniib ande kamiib.
13 Ne anam andaan kuu okad ari wad dobaraniin kumbed
ne kuuYariman ye amun amun wedmaniin.
14 Yariman yaa meedme dobirime.
Aromne arudnime,
kwaneYariman yaa meedme dobirime.